高清睇跑馬：六六駿駒追勁十足

魑魅魍魉

　　第六場四班1600米，「六六駿駒」上季小試牛刀跑了兩仗，今季亦早早上陣，然而進度未見積極，表現欠奉亦可理解，之後又不幸因傷長唞。前仗復出跑田草1400米，不知是體力充沛，還是落至四班有着數，表現大有進步，即使慢閘失了先機，轉彎兜出大外檔蝕位，照樣追近，末段更做出全場第二快的22.96，僅慢過再出上名的「明旺」。

四班極具惡氣

　　上仗總場次696，此駒續爭1400米繼續慢閘，全程留守後排，入直路時安國倫不選擇外檔衝刺，因此沿途被困，拉士一百米才可望空，慘坐包廂拼敗理所當然，但能跑出全場最快末段，殺入一席極接近的殿軍，已確認踏上正軌，今仗出爭四班賽仍霸氣十足。

　　第三場四班1400米，「最著數」初出得殿軍係威係勢，早熟上力再出入Q，只輸畀「鷹之團」並壓倒「麗晶之星」，上仗總場次655，唔跑1000米改攻1200米，路程步速完全唔同，難得照贏可也，仲捧到29蚊極有信心。睇番整個過程，三檔馬早段可守好位，形勢應該有利，然而入到直路，走二叠的「金勝福星」遲遲未褪，外面又有「龍船快」擋住去路，唯有一直跟住「享耆成」，過了二百五十米才望空，難得失了先機仍可後發先至，甚至按韁贏馬，拋離亞軍一個身位，表現出色。賽後雖被評磅員重手加分，但仍可於四班上陣必有優勢，威哥一向作風保守，肯增程至1400米，相信並非無的放矢。

Sam