美國爭氣 墨西哥讓唔起

魑魅魍魉

25/06/2011
文： 亨格比利

美洲兩大最「牛」球星，決戰玫瑰碗球場！美國同墨西哥兩支大熱門，聽朝將會進行金盃夢幻決賽，爭做中北美洲王者。美國大佬當路雲今屆冇料到，風頭畀墨西哥射手查維亞靴南迪斯搶晒，呢啖氣雲哥又點吞得落先？咪忘記美國領隊巴特利對上兩圈調動盡顯功力，難得美國主場出擊受讓平半，梗係要下盤啦！（now634台及廣東體育周日早上9:00直播）




美國同墨西哥係中北美洲宿敵，兩大勁旅過去10屆金盃包辦咗9個冠軍，今次更加係雙方連續第3次喺金盃決賽碰頭，一班Fans即使未知4強戰果，都估到決賽戲碼9成係由佢哋對壘，所以當決賽波飛喺前日開售，唔夠24個鐘就火速售罄，可以預期聽朝玫瑰碗球場嘅氣氛肯定熾熱。


美國領隊有料到


東道主美國喺小組賽輸過畀巴拿馬，之後對住瓜德羅普亦只係贏得1粒，累到唔少捧場客損手。不過亨格比利就對美國好有信心，畢竟佢哋喺上屆決賽先吞完墨西哥5蛋，領隊巴特利同中堅葛特臣都對呢場敗仗耿耿於懷；最重要嘅，係美國Icon當路雲今屆表現勁失色，為咗重拾聲威，呢位美國當家「牛仔」賽前話明會大打爭氣波報答Fans嘅不離不棄，全隊上下嘅決心真係爆晒燈。




事實上，美國晉級過程雖欠說服力，但領隊巴特利8強變陣成功砌低牙買加，4強贏巴拿馬雖一度陷入僵局，又係經佢老人家喺下半場調入當路雲同費迪艾度，成班波即時生晒，足證巴特利嘅臨場應變能力好強。當然，美國今場有前鋒艾迪杜里拉傷腿筋要抖4至6周，阿古迪路將續擔正，拍住當路雲攻堅。


「小豌豆」輸大賽經驗


對家墨西哥頭兩場分組賽都大炒對手，點知近戰愈踢愈跌Watt，先係8強反勝危地馬拉2:1，4強亦要同洪都拉斯鬥到加時先晉級，齋計體能已經比「花旗兵團」輸蝕。係，被當路雲譽為最「牛」球星嘅查維亞靴南迪斯，今屆表現真係好Sharp醒，不過講到踢大賽決賽，佢經驗始終差啲，「小豌豆」上次喺歐聯王者戰隱晒形大家有眼睇，今仗又有可能重蹈覆轍玩失蹤，邊讓得起有主場之利嘅美國呀？


美國防線靠得住


‧對上6次遇墨西哥有4次開大。

‧今屆金盃5戰有4場保持不失。

墨西哥對賽輸蝕

‧自07年決賽後從未喺金盃輸過波。

‧近6次遇美國錄2勝1和3負。

近5屆金盃決賽戰果

年份 對賽隊伍

09年 墨西哥 5:0勝 美　　國

07年 美　　國 2:1勝 墨西哥

05年 美　　國 0:0和 巴拿馬 加時互無紀錄，12碼美國贏3:1

03年 墨西哥 0:0和 巴　　西 加時墨西哥贏1:0

02年 美　　國 2:0勝 哥斯達黎加