借題發揮：今日坐騎多兼夠分量 柏寶田戰攞慣A

猪拉多纳

　　柏寶近日手風唔算順，尤其是他胯下好些公眾大熱門馬，跑完要用放大鏡先至搵到，如「歡欣滿載」、「駿馬飛騰」、「樂韻悠揚」、「羅馬奔騰」。姑且唔好理關唔關柏寶嘅事，可能係馬匹本身有內在問題，總之，喺佢手上輸咗，就係輸咗，作為馬迷，只知熱門倒灶，就係咁多！

　　或者韋達復出，令到柏寶有番一份拼搏心態，原本之前係咁孭鑊，熱門叮完又叮，但韋達當日復出，雖然光芒蓋過柏寶，起碼佢都起到個孖。至於上期谷戰，成績普通係意料中事，大騎師得3匹馬跑，半放假性質工作而已！

　　今期阿寶跑好多馬，9匹坐騎，點秤都比韋達強，唔係冇本事數胡。而根據今季紀錄，佢在田草A欄成績，往往幾好，季內跑咗十期八期田草A欄，佢好少單日冇馬贏（對上四、五期俱有W）。所以，結合今次佢胯下嘅惡馬，應該會叫好又叫座。

　　阿Jack揀咗佢其中3匹熱門嚟買，「氣定神閒」、「喜運財星」及「鷹之團」是也，賠率全部偏熱，不過，前兩駒恨贏恨到發燒，後駒則貴為直路賽專家，畀人感覺幾有信心！

Jack