洪禮賢講馬：精英勇士快樂無窮杯盃勝神童 滿地金太陽海岸朝東飛駒太平星

猪拉多纳

　　今日沙田A欄賽事，韋達及柏寶依然多實力馬在手，不過，馬偉昌與勞愛德亦唔係冇揀手貨，好多仲係有賠率，不妨嘜實佢兩個。

重心場次　第9場　第三班（80分-60分）1600米

　　「滿地金」借助安國倫功架，馬匹操作性比上手好，預料後勁爆得仲強。總之，由上場「川河勁駒」，變為一批三班對手，何止「降呢」一個班次。加上，本身喺外地有晒負重經驗（131磅分獲冠亞），133磅都唔怕。

　　「太陽海岸」賽前辣工夫照做，係進度未夠？定係上場未有三班經驗才輸？今場會水落石出。「太平星」配小何數據盲門（騎練今季合作十幾次冇P），惟上場入Q交番出應有水準，值追。「風雲武士」係跟前的話，此程能否應付才可真切定論，因前仗跑法唔多啱數。「正歡騰」及「一路順風」，要賺形勢始有P望。「朝東飛駒」以之前同程上名賽績，喺度好惡。

第1場　第四班（60-40分）1000米

　　「風動寶」唔跑轉彎嘅谷草，或嫌長嘅中程，有利無壞，以其速度，四班夠晒用。「麗晶之星」今仗跑線比上賽更好，肯繼續擺前走，有本錢入P。

　　「中國好」明顯受惠上期谷草形勢，當然，此程曾與「一定爆」串Q，有晒級數。「好中煌」未定性，而出腳仍時有錯亂，但見大閘試前又試後，算係做足程序，跑唔跑得好則要睇質地。「好妙星」和「好歌」乃邊線腳。

第2場　第五班（40-10分）1800米

　　「大衛金剛」難贏唔襟鬥，只因跑法主動及檔好，或可在前列返來。「呼風喚雨」唔係狀態甩皮甩骨，喺五班長途係尖子。

　　「愛心大使」新勝此程，仲要喺盲門田草，的確跌晒眼鏡，惟今場冇咗內檔唔知發揮會差幾遠。「神箭金剛」和「綠駿群英」，前駒跑開有狀態支持，後駒剛要視乎病完有幾大影響，配腳則應要拖。

第3場　第四班（60-40分）1400米

　　「氣定神閒」最大敵人係自己，比較難留，遇上慢步速好易喺前中段人馬鬥散咗，好彩喺外檔起步易走生位，處境較理想。

　　「最著數」及「好食德」，亦具冠軍相，前駒卻弊在3歲仔要孭133磅；後駒初出「外遊」拉士唔斷仲肯湧吓，加程會係好事，還望今場10檔，韋達發揮唔會再賣大包。「音樂家」守好位靠檻，冇其他殺着，如今場步速慢才有機。「般若」換德叔或更切合馬性，如不再末段處理太hea，或有生機。

第4場　第五班（40-10分）1400米

　　「偉感」落班所遇對手完全係另一批（過去五班兩戰得WP），如可交出3仗前獲殿軍表現，已具贏面。「雄心馬主」望穿秋水等今日，終肯正正常常跑番1400米，用埋小將，略有「又贏晒」影子。

　　「森淼盛」此程明明嫌短，偏偏季內長跑長有，4場有3場入三甲，要拖。「團隊福星」排外檔如索性跟前，或有意想不到效果，總之，上賽初跑此程已有好走勢。「好小子」剛仗跟好位返嚟冇P，略失望。

第5場　第四班（60-40分）1200米

　　「精英勇士」剛賽已揀過，全因前仗延誤了衝程仍追得好，當然，呢匹馬追唔追得過，好睇本身呼吸系統問題。「快樂無窮」確認加了磅令戰鬥力稍拖低，不過，對住呢批對手已夠用。

　　「搖滾雄豐」冇內檔唔易應付。「神童」寄望加眼罩及縮程有預期成效。「杯盃勝」2、3月曾經停課，之後操番足晒，如後遺症不大，根本8成馬已夠爭。「良辰美景」表現好壞，視乎閘前及入閘後情緒。

第6場　第四班（60-40分）1600米

　　「喜運財星」谷草一哩幾乎贏，表現與賽前預期相符，好開一定要追。「明旺」又係另一進入穩定期嘅年輕馬，要揀。

　　「六六駿駒」經常慢閘而直路要操作得好好才肯追，呢匹近仗一再識追嘅馬，可爭欠穩。「進攻足球」係腳傷定係唔啱谷戰，令上場咁失準，今仗有答案。「卡加精神」和「高分貝」，一放一追，同樣具威力。

第7場　第三班（80-60分）1200米

　　「禮尚往來」賽績勁到不得了，鍊得贏「喜惑」及「伽羅」，二班實有馬贏，今場係擔心133磅會對能力打幾多折。「點石成金」長直路如對隻馬有幫助，會係前駒勁敵。

　　「軒轅勇將」係路程專家，論級數則未必及得上前兩駒。「沙紙」和「精靈勇駿」跑法上喺今場應以前駒略為理想。

第8場　第三班（80-60分）1000米

　　「鷹之團」及「勁闖駒」，喺此程最有把握力，重磅及跑線，寄望對佢哋嘅影響唔會太多。

　　「黃金年代」能夠被閂前路而修正到贏埋，剛仗取勝姿態幾難，要重視。

　　「仁心仁術」落地日子唔耐，不過，大閘試得幾好。「太極至尊」負磅形勢比上賽有利，唔係冇本事反先。

第10場　第二班（100-80分）1400米

　　「家樂飛」少負10磅，令佢喺二班有番晒優勢，只要唔係小將舞唔掂，有贏面。「如願以償」跑法安全，預咗賺腳程，夠唔夠班則跑過至知。

　　「摩法神采」有番1場熱身，即加程配合，有晒郁手意向。「爪皇盛水」二班實夠，「超群名駒」亦然，邊線腳。

　　「正白旗」上場有拖，贏得險或是磅重及路短問題而已，加程其實仲好。

馬會賽馬節目主持　洪禮賢