瑞典搶得失球炒哥倫比亞

猪拉多纳

28/06/2011
文： 笛子波童

同組哥倫比亞女足於利華古遜挑戰瑞典。瑞典近年成績雖然走下坡，但面對首次參賽、經驗有限嘅哥倫比亞依然勝算甚高，記得上屆瑞典首場分組賽大意失荊州，成為無緣打入八強關鍵，為免重蹈覆轍，今次更要打醒十二分精神，一於捧1.63倍「讓球客勝」。（有線64台周二晚9時直播）




哥倫比亞係今次決賽周兩支首度參賽球隊之一（另一支為赤道畿內亞），經驗跟從未缺席決賽周嘅瑞典相比差一大截，而且佢哋雖然於去年勇奪美洲國家盃亞軍，並憑此取得今屆參賽資格，但睇番整個比賽表現未算太有說服力，如非智利、阿根廷演出更不濟，哥倫比亞未必可以攞到亞軍。


上屆小組飲恨出局


瑞典○三年曾打入世盃決賽，可惜最終不敵德國屈居亞軍，上屆參賽係佢哋成績最差一次，分組賽三戰得四分排第三，未能進身淘汰賽，當時出局最大關鍵係瑞典於首仗只能打和實力最弱嘅尼日利亞，最終以得失球差不及北韓被踢出局。今屆瑞典再跟美國、北韓同組，首仗又面對被認為實力最弱嘅哥倫比亞，為免好似上屆咁失威，瑞典今仗唔單止要贏，仲要力爭入球，為日後一旦計算得失球差打好基礎。