岐阜6連敗難翻身

猪拉多纳

29/06/2011
文： 蘇豪

日乙周中開快車，包尾大幡FC岐阜季初表現極曳，有如黃大仙上身瘋狂派分，聯賽十二戰輸十場，近期錄得聯賽六連敗，攻守發揮未見起色，今日作客對鳥取飛翔，預計又會捱打，一於再反多鋪，捧主W！（周三晚6時開賽）




FC岐阜人腳麻麻，開季至今一直演出欠佳，聯賽十二戰錄得一勝一和十負，只於主場贏過水戶蜀葵，反映球隊級數一般。岐阜近期愈踢愈差，近六場賽事輸晒，加埋只入兩球，大軍攻不銳守不穩，今季聯賽作客一和五負，大有機會繼續沉淪。




升班馬鳥取飛翔最大名氣嗰個叫做岡野雅行，呢位老將年紀一把，上陣機會唔多。不過一眾土炮表現爭氣，進攻主力實信憲明已入四球，雖然大軍位處中下游，但於主場頗具威力，近兩次主場出戰先後戰勝京都不死鳥及湘南比馬，對住岐阜夠殺。


溫泉近8戰7大再追


同日草津溫泉主場對FC愛媛，溫泉攻強守弱，近八戰七場開大，球隊擁有拉芬夏、阿歷士漢歷基等優質攻擊球員，前線火力甚強。愛媛兩大射手齋藤學及祖斯馬亦有料到，兩軍都識入波，捧大最好。冇入波，攻力難予人信心，今場一於捧細盤。