賠率有路捉：白蹄烏飛數硬淨

猪拉多纳

　　嚟到最後三個賽日，賽果開熱定開冷，真係好難估，但噚日飛數就話你知，韋達唔似講笑，佢二至九場嘅坐騎一度成為大熱門，唔通又係佢贏晒？筆者唔敢斷言，事關除咗四場「享耆成」及五場「明達」，其他場次嘅大熱W飛同P飛都唔係集中喺同一隻馬身上，都係小心啲好。

　　第三場四班泥地一哩，「白蹄烏」個P竟然曾成為大熱門，得1.6倍，最神奇嘅係，佢個W都有料到，一度落至5.6倍。睇番呢匹馬至今六戰嘅最後賠率，徘徊喺16至99倍之間，今次飛數咁勁，究竟點解？

　　原來呢匹馬嘅泥地性能一早證實過，前仗喺同程跑第五，其實已壓倒兩匹喺泥地一哩贏過馬嘅「稻庭烏冬」及「童夢」，今次磅輕檔好，嚟料唔出奇，一於跟番注。

勞愛德手執摩廐惡馬

　　騎師王方面，韋達做大熱門，但情形正如上文，唔算太穩陣，事關今次佢有1.65倍，唔算熱得交關，純以賠率睇，6.5倍嘅潘頓同7倍嘅勞愛德都挑戰到佢，而且後者今日手執摩廐惡馬，不妨揀佢。

周仲