北韓受讓唔怕跟！

猪拉多纳

02/07/2011
文： 麥馬拿仁

今晚女子世界盃C組分組賽次輪賽事，北韓女足鬥瑞典女足。瑞典雖屬傳統勁旅，但明顯已經今非昔比，前鋒舒蓮同蘭絲唐把握力弱，球隊體力又曳，啃唔落北韓班女戰士。北韓能同美國拉成均勢，就知班波有料到，今仗受讓捧北韓「讓球主勝」！ （有線64台周六晚8時直播）




瑞典係傳統女子足球強國，但近年青黃不接成績下滑，上屆世界盃就於分組賽出局，而兩年前女子歐國盃，瑞典就於八強不敵挪威畢業。瑞典以往兩大名將漢娜龍格保及維多利亞史雲遜，分別於○八同○九年退役，球隊就開始失去重心，成績下跌非常正路。


瑞典新箭頭屢失機


現時瑞典搵舒蓮及蘭絲唐攻堅，後者上場雖然一箭定江山，但全場浪費無數入波機會，絕對係個「敗家女」，靠佢食胡就蚊瞓。事實上，瑞典攻守算係有Form，但人腳實力唔標青，今仗五五波讓唔起對手。




北韓係亞洲女子足球強國，去年女子亞洲盃就殺入決賽，面對身材高大、速度甚高嘅澳洲，北韓九十分鐘都冇輸波，最後只係射輸十二碼飲恨。C組首仗鬥勁旅美國，北韓絕對有機會先開紀錄，而在落後一球後，李藝景亦曾轟中門楣，最後力戰而敗屬情有可原。北韓球員以硬淨、具韌力著稱，今場肯定同瑞典搏老命，受讓贏埋唔奇。