瑞典乘勇剷平北韓

猪拉多纳

02/07/2011
文： 亨格比利

女子世盃今晚上演兩場C組賽事，打頭陣有北韓女足對瑞典女足。瑞典上屆喺分組賽出局，搞到唔少球迷跌晒眼鏡，今屆佢哋打破首戰不勝喺宿命，似乎決心一雪前恥，以首仗擊敗哥倫比亞嘅表現，要乘勇砌低北韓唔難，捧2.25倍客勝。（有線64及中央5台周六晚8:00直播）




從未染指世盃冠軍嘅瑞典，對上5屆賽事都喺分組賽首戰失分，但今屆終於爭番啖氣，首輪C組賽事以1:0擊敗哥倫比亞破宿命，呢場波如果唔係蘭絲唐錯失幾個黃金機會，哥倫比亞肯定唔止輸咁少。




雖然話兩位名將包括漢娜龍格保同維多利亞史雲遜已經退出國家隊，不過瑞典領隊丹拿比就指呢支北歐勁旅已經改朝換代，仲話手執史上最好人腳添，似乎想藉今屆賽事大翻身。




北韓主力畀雷劈未復原




查實今仗係北韓同瑞典連續第3次喺世盃分組賽碰頭，對上兩次北韓都輸晒，擺明畀對方食住。最令人擔心嘅係門將、4位後衞同幾位中場上月喺平壤練波時畀雷劈中，就連主帥金光民都話佢哋未完全康復，加上班波只得5位球員擁有多過10頂喼帽，人腳、狀態同經驗都輸蝕，今鋪輸少當贏。