吳嘉晉首奪騎師王

猪拉多纳

葉廐見習生吳嘉晉自於6月5日在港初出道，每次上陣均有頭馬紀錄，昨日沙田賽事亦能延續勝勢，雖然頭幾場賽事搏失多駒，但尾段場次成功反彈，第七場先憑呂廐「飛騰」勝回一仗，及至尾場再贏徐廐「好得意」，炮製一對外檔馬孖寶。吳嘉晉次次有馬贏之餘，全日更以34分首奪騎師王，紅牌仔威風八面！
  
飛騰在吳嘉晉胯下直領到底，首次贏草地賽。


炮製外檔馬孖寶


踏入季尾，呂健威氣勢如虹，6月先後憑「勁贏晒」、「好友星威」及「時時攞彩」連奪3Ｗ，昨日7月首戰，又以「飛騰」報捷，個人季內累積24Ｗ，升至練馬師榜第10位。呂健威說：「『飛騰』今仗換吳嘉晉獲減10磅上陣，大大提升爭勝機會，加上臨場快馬不多，此駒得以從14檔切入，輕輕鬆鬆在前面競走，愈放愈順之下率先衝線。『飛騰』泥、草皆宜，不過性能偏向均速，路程暫以1800至2000米最佳，下季踏入五歲大熟期，有望更進一步。」
  



「好得意」再由吳嘉晉建功，徐雨石大讚人馬表現出色，他說：「『好得意』今場排13檔起步，形勢惡劣，但吳嘉晉依然可以迅速切入貼欄領放，讓坐騎充分發揮均速威力，騎者表現實在值得一讚。」