尼馬瑪達森巴王牌ShowTime

猪拉多纳

03/07/2011
文： 朱楓

巴西貴為足球王國，無論幾時、邊度、參加乜嘢賽事都肯定係焦點所在。「森巴兵團」今晚分途出擊，打頭陣由女足喺世盃分組賽火併挪威，合演一場D組榜首大戰；至於改朝換代嘅男足就會喺美洲國家盃登場，喺B組面對弱旅委內瑞拉。究竟係瑪達勁抑或尼馬醒？今晚自有分曉！


巴西女足有姿細冇實際


今晚巴西女足會喺女子世界盃D組同挪威合演榜首大戰。「森巴兵團」本被譽為今屆爭標熱門，但首戰對澳洲表現認真麻麻，可以話有名氣冇霸氣，「女版細哨」瑪達更加踢到冇晒影，對住把握力一般嘅挪威，朱楓認為唔會多波入，1.85倍入球細值得秤先！（有線64及中央5台周一凌晨0:15直播）


挪威把握力曳爆


巴西首戰對澳洲，本來被認為可以輕鬆取勝，點知踢嚟全無霸氣，真係有姿勢冇實際，五屆世界足球小姐瑪達更被對手後防Mark到實一實，一啲貢獻都冇，最終「森巴兵團」僅靠後衞羅姍娜一球世界波贏1:0。賽後巴西領隊基爾頓利馬話今場想贏挪威，球隊表現一定要改善，仲暗示隊波唔可以再靠瑪達，可想而知巴西喺今屆世盃優勢已經冇之前咁大。事實上，睇番今屆女子世界盃，各隊實力接近咗幾多，爭取入波已經冇之前咁易，巴西今場想爭「士哥」真係有一定難度。




95年女子世界盃冠軍挪威，首戰表現亦唔好得巴西幾多，對住新丁赤道畿內亞女足，全場有勁多入波機會，但唔係近門「炒飛機」就係射斜，最後只僅勝1:0，把握力認真曳，今場對住實力更高嘅巴西，真係隨時連波都入唔到都唔奇！


賽制


目前為分組賽，16隊分成4組，每組前兩名進身8強淘汰階段賽事，同分就先計球差然後再計總入球、對賽決定排名。