巴西男足4星陣攻委內瑞拉

猪拉多纳

03/07/2011
文： 亨格比利

力爭美洲國家盃3連霸，加上今次喺死敵阿根廷嘅國土出擊，衞冕嘅巴西當然恨捧盃恨到發燒啦！「森巴兵團」今晚喺美洲盃B組強勢登場，由山度士「孖寶」尼馬、甘素再加埋羅賓奴同柏圖齊齊開火，呢個「巴西四星陣」絕對唔講得笑，委內瑞拉想唔做炮灰都難咯，1.55倍「讓主」趁熱食！（有線61、64及201、中央5台周一凌晨3:00直播）


兩日操6課唔敢輕敵


冇卡卡、朗拿甸奴同路爾斯法比安奴嘅巴西，陣中有14名國腳代表次數唔夠20次，經驗唔係咁夠，領隊文奴文尼斯上星期就指東道主阿根廷先係大熱，擺明想幫一眾小將減壓。佢老人家尋日仲喺記招度話，今仗對手委內瑞拉唔係「死雞」，提醒班手足咪輕敵。




據巴西傳媒所講，「森巴兵團」過去兩日總共展開咗6課操練，備戰態度相當認真，當中柏圖同尼馬勁有火花，傷愈冇耐嘅甘素亦都弗番，加埋羅賓奴負責穿針引線，預計文奴文尼斯會以「4213」陣式出擊，由「巴西四星陣」肩負攻擊重任，委內瑞拉防線肯定有得震冇得瞓。




早前喺美國達拉斯舉行訓練營嘅委內瑞拉，過去13次參賽有12次喺分組賽出局，證明實力同其他南美勁旅有一段距離。兩位喺西甲搵食嘅箭頭包括荷西朗頓同米古係有料，弊在中場靈魂艾蘭高自前年轉投慕遜加柏後跌晒Watt，今仗仲因為左腳足踝受傷要紮住上，表現肯定大打折扣，今晚莫講話輸少球，睇怕連破蛋都有難度。


巴西半場不失夠硬淨


‧近6次遇委內瑞拉有4勝1和1負。




‧今年踢4場國際賽全部半場保不失。

委內瑞拉美洲盃冇料到

‧參戰美洲盃13屆有12次分組賽出局。

‧出戰美洲盃49戰錄2勝9和38負劣績。