巴拉圭三叉戟斬瓜切菜

猪拉多纳

03/07/2011
文： 牛奶仔

美洲國家盃B組賽事今晚展開，尾場由巴拉圭大戰厄瓜多爾。巴拉圭今屆以最強陣容出戰，由巴里奧斯、辛達告魯斯及希度華迪斯組成嘅三叉戟，有望大展威力擊潰對手，正路要1.85倍主勝。（有線61及201周一清晨5:30直播）




巴西肯定係B組出線大熱，至於小組次名之爭，相信巴拉圭同厄瓜多爾會有一番惡鬥，今仗雙方狹路相逢當然係不容有失。巴拉圭上年傷兵滿營都能夠殺入世盃8強，實力絕對不容忽視，當中最大功臣、領隊馬天奴繼續留任領軍，誓要打破巴拉圭近8屆美洲盃8強止步嘅魔咒。




慣用4-3-2-1陣式嘅馬天奴今次以去年世盃成員做骨幹，雖然賓菲加射手奧斯卡卡度素就意外落選，不過前線仍然有巴里奧斯、希度華迪斯及辛達告魯斯壓陣，配合新紮箭頭施巴路斯同埋奧斯華度馬天尼斯，前線不乏數胡人物。


厄瓜多爾離開高原就玩完


世界排名比對家低36位嘅厄瓜多爾，一向都係靠高原主場搵食，今次嚟到阿根廷相信難再逞強。同時，沙列泰馬同古亞哥亞兩名中後防主力都因傷冇入選，領隊魯達惟有選入多名經驗較淺嘅球員，只靠路爾斯華倫西亞單天保至尊，實力不宜被高估。


美洲國家盃賽制


12支球隊分3組踢單循環賽，每組首兩名及兩隊最佳成績第3名躋身8強淘汰賽。