科蘭顯身價烏拉圭抵買

猪拉多纳

04/07/2011
文： 朱楓

今屆美洲盃，好多人都認為係巴西同阿根廷之爭，實情烏拉圭都唔係好恰，淨係個前線鐵三角已經嚇死人，聽朝喺C組首場分組賽，對住陣容天殘地缺嘅秘魯，大勝冇難度，朱楓推介2.1倍「讓球主勝」！（有線61及201周二早上6:15直播）


秘魯陣容天殘地缺


烏拉圭陣容幾乎同上年世界盃攞殿軍時一樣，世盃金球獎得主科蘭、利物浦射手蘇亞雷斯同拿玻里「入球機器」卡雲尼都在陣。盛傳會被馬體會賣走嘅科蘭，今屆美洲盃正好畀佢重新證明身價，事實上烏拉圭國民對呢位傳奇射手有好大期望，一名畫家近日更畫咗幅破世界紀錄嘅科蘭超巨型漫畫嚟支持佢，再加上全隊賽前又獲烏拉圭總統穆希卡親自接見，士氣爆燈。




秘魯近年喺美洲國家盃成績唔錯，已經連續5屆小組出線，可惜今屆繼隊長比沙路同史浩克前鋒法芬打柴後，再有中場拉美尼斯同後防森拜奴受傷退隊，漢堡前鋒荷西古里路亦喺上仗對塞內加爾嘅友賽受創，今仗或與費倫左翼祖安華加斯作壁上觀，認真黑過墨斗，陣容殘到爆炸，輸2粒都執到啦！