英日女足鬥Hea唔識入波

猪拉多纳

05/07/2011
文： 走肖

一隊輸都冇所謂、一隊就提早出線，英格蘭女足今晚喺女子世盃B組對日本女足，玩入球細比較實際，首先英格蘭女足輸都好大機會出線，唔慌會搏命，其次日本女足教頭佐佐木則夫暗示，今場會收起部分進攻主力，Hea踢味濃唔似會開入球騷。（有線61、64及中央5台周三凌晨0:15直播）


日本收埋主將留力8強


現時英格蘭有4分，領先第3位嘅墨西哥女足3分，由於兩隊對賽打和，英格蘭女足得失球差係+1球，墨西哥女足得失球差係-4球，咁即係話，除非英格蘭女足慘敗，又或者墨西哥女足有本事大勝新西蘭女足，否則英格蘭女足輸波都好有機會出線，咁嘅情況，今場佢哋邊似有決心搶攻鬥入波？




另一方面，日本女足連贏兩場提早出線，領隊佐佐木則夫講明，呢場唔會刻意改變陣容，不過會嘗試用其他狀態好嘅中前場球員打正選，講就好聽，其實佢係打算留力8強，上場連中三元嘅隊長澤穗希已經32歲，就算佢繼續打正選，都唔似會踢足90分鐘，加上領隊落柯打留力，球員避重就輕唔似多波入喎。