挪威收晒火難炒澳洲

猪拉多纳

06/07/2011
文： 法比加輝

D組最後一輪分組賽，澳洲女足與挪威女足爭出線。由於挪威上場遭巴西大炒，得失球差不及澳洲，所以今場必須贏波。不過挪威今屆只係入得一球，要贏澳洲談何容易，捧受讓嘅澳洲「讓球主勝」。（有線64台周四凌晨零時直播）




D組形勢明朗，巴西已出線，而赤道畿內亞女足就提早畢業，餘下席位就由澳洲與挪威之爭。澳、挪兩軍雖同得三分，但基於挪威上場淨吞巴西三蛋，所以得失球差不及澳洲，今場要贏波先能夠同巴西攜手出線，澳洲有一定優勢。




挪威首戰幾經辛苦先小勝赤道畿內亞，而上場面對高一班嘅巴西更加「冇得踢」，全場捱打下淨吞三蛋！反觀澳洲對巴西時並唔失禮，力戰下只係僅敗一球，防守力唔曳，預計今場頂得住挪威之餘，仲有權憑反擊贏埋，澳洲「讓球主勝」及澳洲主W都值得捧場。


巴西留力捧對家


另一場赤道畿內亞對巴西，巴西已出線，估計球隊會畀班主力休息。「讓球主客和」巴西讓二球，投X者大可買晒赤道畿內亞「讓球主勝」及「讓球和」。（有線61台周四凌晨零時直播）