阿根廷死火咬唔入哥倫比亞

猪拉多纳

06/07/2011
文： 朱楓

阿根廷首仗倒灶被玻利維亞逼和，美斯踢國家隊跌Watt係人都知，咁梗係啦，阿根廷班球星個個都係大帝，加上捱咗成季歐洲賽，想佢哋好似巴塞班人咁走動幫美斯拉開空位？好難咯！今仗佢哋嘅對手仲要係未見底嘅哥倫比亞，呢場美洲盃A組榜首大戰，朱楓寧願冷吼3.2倍「讓球客勝」好過！（有線61、64及201、中央5台周四早上8:45直播）




被捧為爭標大熱嘅阿根廷，首仗表現令人極度失望，居然被弱旅玻利維亞逼和1:1。對於嗰個失波，一向斯文嘅巨星美斯亦罕有發火，話同踩狗屎冇分別。由於首場表現實在太差，事後阿根廷《號角報》同《奧萊報》做民意調查，結果大部分球迷都認為阿根廷聽朝對哥倫比亞一定要變陣，支持阿古路擔正。


巴迪斯達死都唔變陣


不過領隊巴迪斯達繼續話之你，日前佢受訪時死撐套戰術冇問題，仲喺自己Twitter爆料，話對哥倫比亞嘅正選陣容同首仗唔會有太大分別。其實逐個秤嘅話，阿根廷班球星的確個個都好勁，但係呢班人喺球會個個都係大哥，你要佢哋踢國家隊不斷走動幫班前鋒拉開空位，真係難過登天，領隊巴迪斯達又未搵到一套適合球隊嘅陣式，粒粒巨星變晒暗星玩隱形，美斯同泰維斯冇輸送，幾好波都冇用啦！


哥倫比亞實力未見底


哥倫比亞首戰雖然只係僅勝哥斯達黎加1:0，但其實贏得咁少，全因對方一早打少個，餘下時間全力死守。事實上，哥倫比亞喺呢場波控制戰局，每次進攻閒閒哋都搓成十幾廿腳，睇得出射手法卡奧仲未去盡，賽後守將耶比斯仲走出嚟講嘢幫班球員減壓，話今場對阿根廷贏輸都冇所謂，大有扮豬食老虎嘅味道，今場真係有本錢爆冷o架！