烏拉圭智利大晒冷

猪拉多纳

08/07/2011
文： 麥馬拿仁

美洲國家盃C組賽事，烏拉圭惡鬥智利。首輪勁吹細風後，踏入次輪將轉攤路，今戰兩軍鋒線豪華，烏拉圭蘇亞雷斯、卡雲尼弗爆，科蘭亦戰意無窮；智利首仗雖只僅勝墨西哥，但踢得進取攻勢下下到肉。雙方攻強於守，大盤有超過2倍分頭好路！（有線61及201台周六早上6時15分直播）




今個暑期大戰連場，先有美洲金盃，女子世界盃未踢完又有美洲國家盃。撇除強弱懸殊嘅金盃，後兩個盃賽隊伍實力平均，各隊抱試探心情下，首輪賽事均頻頻開細，美洲國家盃頭六場波就有五場開細盤。不過各隊為爭出線權，而且踏入次仗心情冇咁緊張，就會踢得較為開放，女子世盃分組次輪轉吹大風，並非咁啱得咁蹺。


攻強守弱啱key


身價加埋近七億嘅烏拉圭「三叉戟」蘇亞雷斯、卡雲尼同科蘭威力毋庸置疑。上場對秘魯扳平一比一後，科蘭門前「飛機」抵鬧，而後防亦頻頻出錯，若秘魯稍為爭氣亦可入多一、兩粒，智利攻強守弱，不愁冇波入。智利上仗落後墨西哥一粒後圍攻對手，身價超過三億嘅阿歷斯山齊士勁弗極有威脅，加埋漢拔圖蘇亞素、馬迪亞斯費南迪斯、維達爾等進攻好手，值得期待，兼且賽前兩軍球迷發生衝突，有三十七名球迷被拘捕，更增添今場火藥味，大盤博得過。