森巴兵變陣不勝無圭

猪拉多纳

09/07/2011
文： 亨格比利

衞冕美洲國家盃嘅巴西，首戰只能夠悶和委內瑞拉，戰果梗係令球迷失望啦！正所謂窮則變，變則通。巴西領隊文奴文尼斯痛定思痛，連日嚟不斷度橋試陣，外電指佢老人家決定貶羅賓奴做後備，似乎有新招省靚招牌，對住戰鬥力平平嘅巴拉圭，1.57倍主勝唔難開吖！（有線61、64及201、中央5台周日凌晨3:00直播）




巴西首仗悶和委內瑞拉0:0，咁蹺另邊廂嘅巴拉圭同厄瓜多爾亦互交白卷，換言之B組4隊都揸住1分，次輪又再由頭嚟過。首輪分組賽，巴西對住委內瑞拉冇錯係控制戰局，奈何攻勢冇腳到肉，羅賓奴啲花拳綉腿係好睇，弊在一啲侵略性都冇，主帥文奴文尼斯於是決定喺今仗變陣出擊。


艾蘭奴同「新卡卡」擔正


據外電消息，「森巴兵團」周中喺布宜諾斯艾利斯北部集訓，文奴文尼斯特別試咗幾個陣，最突破就係將羅賓奴貶做後備，雖然文奴文尼斯一直保持神秘，堅持開波前先公布陣容，但唔少外國傳媒都估計，攻擊中場艾蘭奴同「新卡卡」盧卡斯洛迪古斯將會喺今戰擔正，取代缺態嘅羅賓奴同防守型嘅拉美利斯，爭勝戰意鮮明。


提防巴拉圭雙「斯」空襲


對家巴拉圭首戰同厄瓜多爾互交白卷，一對箭頭巴里奧斯同辛達告魯斯浪費咗多次黃金機會，絕對係巴拉圭失分嘅罪人。據巴西《環球報》報道，「森巴兵團」喺賽前集訓狂練防守，為應付巴里奧斯同辛達告魯斯嘅高空攻勢做好部署，加上佢哋嘅翼鋒艾格巴列圖有傷要紮住上，想喺巴西防線搵着數唔容易，對住矢志省招牌嘅森巴鋒線隨時輸鑊勁。


巴西半場夠硬淨


‧連續7場國際賽開入球細。




‧近8仗未試過半場落後。

巴拉圭交手例失波

‧近8仗有7場開入球雙。

‧對上4次同巴西交手都有失波。