柏雷素爾主W瞞仙過海

猪拉多纳

09/07/2011
文： 走肖

輸唔係問題，最緊要識反彈，柏雷素爾今晚喺日職主場對仙台維加泰，讓平半捧得過！未計上星期淨吞大阪櫻花5蛋，今季柏雷素爾重返日職後連盃賽輸4場波，跟手嗰場全部贏波反彈，相反仙台傳出將帥不和，作客隨時衰多鋪。（now633及660台周六晚6:00直播）




上季日乙冠軍柏雷素爾，趁住東日本地震攪亂日職秩序，依家仲守住榜首位置，上星期以0:5不敵櫻花，屬於佢哋升班後最慘烈敗仗。不過咁，計埋日聯盃輸畀今場對手維加泰，今季柏雷素爾4次輸波，跟手起碼以兩球差距砌低對手，手下敗將包括浦和紅鑽、橫濱水手、福岡黃蜂同甲府風林。


仙台斷纜將帥鬧不和


咁證明到，柏雷素爾輸波後例必踢爭氣波，射手田中順也今季射入8球，暫列射手榜次席，呢場撞番仙台維加泰，肯定會加多兩錢肉緊，賽前佢亦講到明，今場會搏命入波，希望可以喺8月日本對南韓嘅重量級熱身賽上陣，相信柏雷素爾嘅爭勝動力、反彈力度會更加強。




位於地震重災區仙台嘅維加泰，聯賽重開後連盃賽曾經創出6勝5和不敗佳績，近2場戰績下滑得1和1負，主要係因為日本國腳關口訓充不滿教練手倉森誠安排佢踢嘅位置發牢騷，搞到被雪藏，連續兩場坐冷板，雖然佢已經謝罪可以走出雪櫃，但難免影響仙台士氣，衰開再輸唔出奇。