哥倫比亞1.5倍W趁熱食

猪拉多纳

10/07/2011
文： 亨格比利

試問有邊個估到，哥倫比亞能夠力壓東道主兼大熱門阿根廷，喺美洲國家盃A組坐正「一哥」席位吖？呢隊01年盟主今晚喺Last一輪小組賽面對玻利維亞，只要唔輸已經篤定出線，反觀玻利維亞為爭入8強就非勝不可，弊在佢哋火力薄弱，焗攻隨時畀行軍快速嘅哥倫比亞有機可乘，1.5倍主W趁熱食。（有線61及201、中央5台周一凌晨3:00直播）




今戰安排喺阿根廷聖菲市舉行，先講吓A組形勢，榜首嘅哥倫比亞揸住4分，今仗攞1分都夠出線；包艇嘅玻利維亞最危，要大勝哥倫比亞先有機會晉級，預期形勢處於被動嘅佢哋焗住點都要主動出擊。


馬些路摩連奴入球率低


玻利維亞出名火力弱，自從國家隊射手謝美摩蘭奴退役之後，成隊波食粥食飯都靠晒薩克達前鋒馬些路摩連奴一個，不過佢為國披甲24場只入8球，咁嘅入球率根本畀唔到人信心。再睇睇玻利維亞近8場國際賽未贏過之餘，當中只係入過4球咁大把，老實講焗攻真係盞送死！


哥軍速度快踢法直接


哥倫比亞首戰贏哥斯達黎加1:0，次輪賽事就同阿根廷互交白卷，冇錯兩戰加埋係入得1球，但查實呢班波轉守為攻嘅速度好快，首戰更加攻到哥斯達黎加甩轆，當中古亞連同法卡奧呢對「波圖孖寶」踢法夠晒直接，加上領隊達里奧高美斯好鍾意先踢451陣式，然後搵韋根射手洛達列加入替做「後備殺手」，睇定嚟食，要做低有利維奴同禾達科利斯兩位中後場球員停賽嘅玻利維亞唔難。