阿根廷爭出線 加把勁喪攻

猪拉多纳

11/07/2011
文： 亨格比利

今屆美洲盃奪標熱門阿根廷，踢完兩輪分組賽都未開齋，令唔少球迷大跌眼鏡！呢支東道主聽朝喺最後一輪A組分組賽面對哥斯達黎加，帥位危危乎嘅巴迪斯達，今戰決定變陣用「西甲4虎」救亡，將美斯移後校炮，以4213陣式強攻對手爭入8強，火力咁猛，梗係捧1.48倍「讓球主勝」啦！（有線61、64、201及203、中央5台周二早上8:45直播）




貴為美洲盃主辦國，阿根廷目前喺A組兩戰全和，為爭出線對哥斯達黎加可謂非勝不可。有阿根廷傳媒放風，話「球王」馬納當拿極可能重掌國家隊帥印，姑勿論呢單料堅定流，一旦阿根廷有咩差池，領隊巴迪斯達個飯碗肯定保唔住！


美斯墮後幫希古恩開路


佢老人家前日向巴西《環球體育》透露，今場生死戰會改踢4213陣式，捨棄保守嘅3防中組合，並且收起泰維斯、拿維斯同班尼加，改以美斯墮後校炮，為三箭頭希古恩、阿古路同迪馬利亞提供彈藥，實行以「西甲4虎」組成超級強攻陣，狂轟哥斯達黎加。


哥斯達黎加U23冇料到


對家哥斯達黎加目前錄得1勝1負戰績，陣中最Sharp醒嗰個必數前鋒祖爾甘保，盛傳呢位「新伊度奧」嘅身價已經去到500萬歐元，美洲盃之後肯定大把球會爭住斟。之不過哥斯達黎加嘅戰鬥力去到邊度大家心照，拜仁雷斯、沙保里奧同保蘭奴斯等主將統統冇入選，大軍主要以U23小將組成，經驗同戰鬥力都肯定喺阿根廷之下，加上中場大衞古斯文坐波監，對住來勢洶洶嘅阿根廷輸鑊勁唔出奇。