法國勝在抖多日 4強撼美國冇有怕

猪拉多纳

13/07/2011
文： 法比加輝

女子世界盃四強爆發「法美大戰」，首次殺入四強嘅法國女足挑戰「世界一姐」美國女足。兩軍喺八強都激戰至百二分鐘，先憑互射十二碼取得出線資格，但因美國遲一日比賽，變相少法國一日休息時間。美國係今屆平均年齡最大嘅球隊，體力能否及時回復成疑問，加輝建議捧受讓嘅法國女足「讓球主勝」。　　　　　　　　　　　　　（有線61及64台周四凌晨零時直播）




隨着兩大熱門德國及巴西相繼出局，美國女足已成頂頭大熱，奪標賠率熱至1.9倍。不過加輝就唔太睇好美軍，事關美國在香港時間周日晚先同巴西踢完百二分鐘激戰，美國上半場中段已踢少一人，加時大部分時間落後，球員們都係咬緊牙關搏到盡先奇迹出線，但體力就肯定已消耗過度，大有機會影響今場發揮。


美國年紀大恢復慢


事實上，美國係今屆世盃平均年紀最大嘅球隊，多名主力如雲芭芝、博絲及拉姆邦妮都已達「中女」之齡，年過三十，而中場大腦萊德賽前亦指出，球隊近兩日最注重嘅課題，就係如何回復腳部勞損！




據另一中場奧蕾莉透露，體能教練史葛賽前不斷要球員「足浴」，希望用冰水及按摩令球員雙腳盡快恢復機能，可見美國上場確實搏得太盡，而領紅嘅保娜今場更要停賽。




雖然對手法國亦在八強踢足百二分鐘，但慶幸佢哋早一日比賽，因而多一日休息。再者，法國在今屆賽事愈戰愈勇，上場面對英格蘭佔盡優勢，已證明並非陪跑分子，今回受讓值得捧場，要法國「讓球主勝」。