阿仙奴馬國歎細界

猪拉多纳

13/07/2011
文： 法比加輝

阿仙奴「亞洲之旅」第一擊，今晚作客對馬來西亞明星隊。阿仙奴今夏面臨星散危機，一個二個都想離「廠」他投，就算拿斯尼及艾沙維等有隨隊抵馬來西亞，都未必心繫「兵工廠」。再者一班「大帝」啱啱先放完假，又搭完長途機，又要喺炎熱天氣下比賽，試問點會踢出水準？加輝今場捧入球細。




（now 632周三晚8時45分直播）




除咗即將離隊嘅法比加斯、賓特拿、艾蒙尼亞及新兵謝雲奴外，阿仙奴其餘主力今次都有隨隊出征參與「亞洲之旅」，當中包括「轉會紅人」拿斯尼。但正所謂留得住個人亦留唔住個心，拿斯尼一心離「廠」搵真銀，卻被雲格攬實唔放，試問心情點會好？難怪佢抵馬來西亞後全程黑面，操練時心神恍惚，今季大有可能變成一個冇靈魂球員，而「兵工廠」亦因為兩大主力喊走，令陣內氣氛變差。




此外，阿仙奴球員啱啱先放完暑假，狀態肯定未回復，加上搭完長途機到亞洲，又要出席各大小活動，預計球員已身心俱疲，難以最佳狀態迎戰。再者吉隆坡氣溫高達三十幾度，歐洲球員未必適應悶熱天氣，阿仙奴難以踢出真功夫。


馬來西亞曾細戰魔車


馬來西亞明星隊近年表現唔差，近三年三戰曼聯及車路士，最多都係輸兩球，當中兩場開細。而馬來西亞足球近年亦愈見進步，早前力壓泰國及印尼等亞洲強國贏得東南亞錦標賽冠軍，加輝深信佢哋面對問題多多嘅阿仙奴不致多失，一於捧中位數3.5球嘅入球細。