紅魔訪美對新英倫唔慌去盡

猪拉多纳

13/07/2011
文： 力奇

曼聯嘅季前美國之旅5場熱身賽會喺聽朝揭開戰幔，雖然話佢哋今次強陣出擊，仲有新兵艾舒利楊格登場，對手又只係實力平平嘅新英倫革命，但考慮到佢哋開操冇耐，狀態同體能都未達高峰，未必會有最好發揮，要讓波不如冷敲3.55倍「讓球和」，博紅魔鬼小勝一球收場。（now640台及廣東體育周四早上8:00直播）


新英倫革命9戰不勝


紅魔征美3周踢5場，狀態肯定會不斷提升，不過始終佢哋只係今個月初4號先齊人做體測，開操一星期加上舟車勞頓飛去美國，好難即刻要求佢哋有貨交。再者，今次出征嘅21人大軍之中，包括新兵菲爾鍾斯、迪基亞、射手查維亞靴南迪斯、前鋒韋碧克同守將基斯史摩寧等，都因為踢完國際賽仲放緊假，人腳調動有限，主力朗尼、貝碧托夫同傑斯預計都未必會踢足全場，想大捷其實有唔少難度。




主隊新英倫革命喺美職排尾2，擺明唔夠班。呢隊波由前利物浦名將尼高帶領，對英式踢法會熟悉，但始終實力唔夠，最具名氣都只係兩個法國兵杜美同達保。仲有，佢哋近9場波只得3和6負，狀態唔掂，唯一優勢係有主場之利，肯死守嘅話或者可以輸一球離場！