富咸上力炒鑊甘

猪拉多纳

14/07/2011
文： 朱楓

做人最緊要有自信！富咸門將舒華沙最近大讚球隊近年踢得好，仲話佢哋絕對值得打歐洲賽，信心可謂爆晒棚，今晚喺歐霸盃第2圈外圍賽首回合作客北愛爾蘭十字軍，相信可以領軍輕鬆擊敗呢支業餘球隊，1.4倍「讓球客勝」熱得有道理！（開賽時間：周五凌晨2:45）


富咸近年喺英超表現穩定，對上3季兩度殺入前10，前季更殺入歐霸盃決賽，門將舒華沙可謂居功至偉。呢位澳洲門神近日接受訪問時，就大讚球隊近年表現真係好神奇，取得參加歐洲賽資格絕非僥倖，更相信可以取得同英超一樣咁好嘅成績咁話喎！

舒華沙讚球隊表現神奇

富咸上圈兩回合計以3:0淘汰NSI魯納維克出線，為催谷球員狀態，領隊祖爾日前仲安排好幾名一隊球員代表預備組出戰AFC溫布頓。其實又難怪祖爾咁着緊，畢竟呢位前熱刺教頭啱啱先初嚟埗到，依家打歐霸盃絕對係佢建立威信嘅良機。陣容方面，丹普西同沙斯度因為之前踢金盃仲放緊假今仗繼續缺陣，但其餘好似安祖莊臣、杜夫、梅菲同軒治蘭特等主力相信都會全數披甲，卡士可謂贏晒。

「北愛阿二」抖暑冇態

對家十字軍嚟自北愛爾蘭，雖然呢支半職業球隊上季取得聯賽亞軍，今屆得以進軍歐霸盃，但佢哋近年極少參加歐洲賽，上年闊別11年再打歐洲賽，結果喺歐霸盃第2圈外圍賽一亮相就不敵馬其頓嘅拉布歷基出局，實力有幾多大家心裏有數，再加上球隊目前抖緊暑，近排只係打過1場熱身賽，比起已經打咗2場歐霸盃嘅富咸，狀態肯定冇對手咁好，今場隨時被炒鑊甘都唔奇！

歐霸盃賽制

外圍賽會分為3圈，每圈均採主客兩回合淘汰制，今輪係第2圈外圍賽首回合，若兩回合總比數賽和，以作客入球較多一方為勝，若作客入球數字相同，則在次回合90分鐘後加時30分鐘，若雙方在加時仍未分高下，則互射12碼分勝負。