特雷斯登頭炮科騷

猪拉多纳

15/07/2011
文： Mic少

德乙今晚開鑼，升班球隊特雷斯登首仗作客科特布斯，備受矚目。特雷斯登屬於前東德最成功及最受歡迎球隊之一，球迷對佢哋抱有好大期望，相隔五年後重返德乙，都想有一番作為，眾志成城志氣高，今仗應該有分落袋，特雷斯登受讓，捧2.15倍嘅「讓球客勝」。（周六凌晨零時開賽）




特雷斯登曾經隸屬於東德警察部，有強大後台撐腰，自然獲得較好發展機會，8次奪得東德聯賽冠軍，甚至試過喺1989年打入歐洲足協盃四強（歐霸盃前身），並有份參與德國統一後首4季德甲賽事，可惜之後走向衰落。




特雷斯登難得重返德乙，季前積極增兵加強實力，簽下曾効力史浩克04及緬恩斯等多支德國球隊嘅捷克中場查奧贊、捷克射手福特及前法蘭克福翼鋒馬素希拿，令陣容更完整。而且升班隊往往喺季初可憑一股蠻勁製造驚喜，有力搶分而回。


科特布斯星散讓唔起


至於科特布斯放走咗中國國腳邵佳一及日本後衞相馬崇人，主要新兵係向多蒙特借用保加利亞前鋒蘭治洛夫，但此子上季亦被外借去以色列球隊特拉維夫馬卡比，而且表現差，所以成為「人球」被踢來踢去，難以彌補邵佳一離隊嘅損失。翻查紀錄，科特布斯近6次主場對特雷斯登，僅得1勝，冇本錢讓波。