哥倫比亞當秘魯冇到

猪拉多纳

16/07/2011
文： 亨格比利

美洲盃展開前，相信點都估唔到哥倫比亞會喺A組力壓阿根廷，獲得小組首名出線。佢哋喺美洲盃表現四平八穩，王牌法卡奧亦喺上仗開埋齋，信心同腳風都返晒嚟，今晚有力領軍踢秘魯出局殺入4強，1.68倍主W趁熱食。（有線61、64、201及203、中央5台周日凌晨3:00直播）


法卡奧開齋信心返晒嚟


今場8強賽事喺科爾多瓦舉行，哥倫比亞喺小組以2勝1和不敗成績晉級，既然隊波Run得咁順，領隊達里奧高美斯決定以不變應萬變，繼續以4141陣式出擊，由上場分組賽梅開二度嘅法卡奧擔任單箭頭。其中鋒將阿祖安拉莫斯更加係雄心壯志，賽前聲稱已經將目光放喺4強，擺明當對家秘魯冇到。




咁又難怪嘅，始終秘魯球星比沙路同法芬都因傷無緣美洲盃，成隊最有卡士已經係漢堡前鋒荷西古里路，人腳確實削咗啲。況且佢哋已經連續4屆賽事喺8強出局，今鋪又有鐵衞基安卡路卡莫拿停賽，睇怕就算秘魯足總出到125萬美元（約974萬港元）贏波獎金，都好難改寫近屆8強止步嘅宿命。