梁家俊收入愈滾愈高

猪拉多纳

華將梁家俊剛季憑「多多昇」贏得在港第70Ｗ，正式由見習生升格大師傅，其中一項重大轉變，就是不用再與師傅蘇保羅拆獎金，過去三季，他分別贏出二十多場頭馬，同樣取得超過2,200萬元總獎金，若新季保持成績，梁家俊的收入肯定可以愈滾愈高！
  
領彩大捷，協助蘇廐贏夠13W。





梁家俊剛剛度過先苦後甜的一季，由於蘇保羅起步「脫腳」，直接拖低俊仔的成績，季初頭三個月只獲5Ｗ，幸好俊仔默默耕耘，積極向外尋找坐騎，結果季尾成績顯著飆升，6月1日更以苗廐「多多昇」贏得在港第70Ｗ，升格畢業，邁向策騎生涯新里程。進身大師傅之後，獎金毋須再分拆給師傅或提供坐騎的練馬師，自己袋晒，近三季俊仔都可以獲逾2,200萬元獎金，剛季收入約150萬元，假如新季成績無大起落，快將23歲的小伙子可以搵得更多。
  
畢業當晚，與家人分享喜悅。

難忘畢業一刻


回顧剛季，梁家俊最難忘贏馬畢業一刻，以及煞科日替師傅湊夠13Ｗ上岸。「剛季我一早訂下目標，希望能夠贏夠70Ｗ畢業，雖然等到季尾始憑『多多昇』達標，但總算沒有浪費自己一番努力，當晚衝線一刻，感覺相當難忘。除此之外，煞科日替『領彩』建功亦意義重大，蘇保羅一直為上岸而作出努力，苦戰至煞科日終於由我完成任務，作為徒弟，沒有甚麼令我更值得高興。其實，剛季我只為蘇廐贏得『放縱』及『領彩』兩Ｗ，希望新一季可與師傅攜手炮製更多頭馬。」梁家俊說。
  
多多昇（右）擒下歡欣星，成為畢業頭馬。

月底征戰澳洲


梁家俊又透露，煞科後會先休息充電，直到本月底左右，始會參加由澳洲達爾文賽馬會主辦的國際騎師邀請賽，去年俊仔遠征新加坡，贏得亞洲見習騎師挑戰賽冠軍，今年又有機會為港爭光。而完成澳洲之行後，梁家俊便會回防備戰新馬季。
  
成功上岸，獲師傅蘇保羅激讚。

未畢業獎金都要分


現行見習騎師獎金分配比例，會隨着贏馬數目增多而改變，見習生贏出十匹頭馬之前，當中一半獎金將會撥給所屬或提供坐騎的練馬師，例如葉廐見習生吳嘉晉，在港第一Ｗ「軒轅勇將」來自葉楚航馬房，所得獎金須與師傅對分，第二Ｗ則是徐廐「好得意」，吳嘉晉佔50%獎金，而葉楚航、徐雨石各佔30%及20%。
  





勝出第11至70場賽事，見習生若替所屬馬房建功可分得70%獎金，但假如只替非所屬倉口贏馬，見習生只佔60%。直至取得70W以上（畢業後同日賽事），見習騎師獎金分配比例增至85%，梁家俊以「多多昇」贏夠70Ｗ升格，牌委會向他發出自由身騎師牌照，之後梁家俊多取8Ｗ，再毋須將獎金分給任何練馬師。

贏過13倉搵銀有門

展望新一季，梁家俊指出最近兩季均能取得25場頭馬，當然希望新季不會少過此數字，除主力替蘇廐効力之外，亦會繼續開拓與其他練馬師合作，剛季他先後為13個馬房建功，華洋參半，足見此子搵銀有門。此外，梁家俊近季亦有高班贏馬紀錄，前季憑藉摩廐「創惑」首奪本地三級賽精英碗，剛季亦有「愛跑得」勝出一班賽，相信很快可以達成個人贏大賽的夢想。