洪禮賢講馬:「非同凡響」五班頭馬

猪拉多纳

　　問題馬再出有冇問題？如果喺我細路仔嗰個年代，即係80年代初期左右，10隻再出輸晒10隻。至於「問題馬」嘅框框，其實涵蓋嘅意思可以好大，唔一定係上賽畀小組抽秤完，至會叫「問題馬」。啱啱贏完嘅，一樣可作如是觀，只係問題嘅定義唔一樣。

　　此外，馬迷們亦未必一致認同每1隻問題馬。當年「協和之威」，記得嗎？以低B班時間贏場五班1800米，總時間1.59.3，慢到難以置信！數番逾10年嘅五班該程，嗰50幾匹頭馬締速（2001至2011年），冇1匹可以比較「接近」，造出1.52.7嘅「鴻鵠」，已經係「極限」。可想而知，「協和之威」當年咁龜速都贏到，同場啲對手可能集體忽然失準？﹗

　　當然，現今賽馬水準，比當年叻好多，唔可以用同一時間標準，但1.59.3呢個頭馬時間，仍覺「非同凡響」。但洪某覺得唔順眼，並唔代表一定係事實，冇記錯的話，「協和之威」嗰場賽事頭三兩段係幾慢，簡單一句「慢步速受益者」，其實亦都過得骨。

洪禮賢