拜仁搶盃旗開得勝

猪拉多纳

01/08/2011
文： 朱楓

矢志喺新球季擸盡所有錦標嘅拜仁慕尼黑，今晚打首場正式比賽，喺德國盃首圈作客乙組仔布倫瑞克。賽前德國傳媒踢爆拜仁會強陣應戰，加上新帥軒基斯話明要贏呢個盃，朱楓捧1.85倍「讓球客勝」！（無綫翡翠台及廣東體育周二凌晨2:30直播）




上季四大皆空嘅拜仁，今季矢志反彈，除咗請得軒基斯第三度執教球隊，仲簽入紐亞、謝路美保定等多位球星。最近呢支德甲班霸打咗4場熱身賽，但喺法定時間內一場都未贏過，奧迪盃又屈居巴塞之下得亞軍，表現令人失望。


布軍主帥牛一認低威


為咗爭番面子，《慕尼黑日報》日前爆料，話拜仁已經定好今晚正選陣容，除咗洛賓同列貝利受傷肯定缺陣，基本上所有主力都會擔正，早前喺奧迪盃決賽搶鏡嘅日本超新星宇佐美貴史，就會擔任後備作秘密武器。賽前教練軒基斯話今場對布倫瑞克絕對唔會玩玩吓，話明今季除咗德甲冠軍外，仲視德國盃為目標，提醒球員唔好輕敵。




等咗26年，布倫瑞克終於有機會再同拜仁交手，賽前23,500張門票一早賣晒。鬼咩！今季以丙組冠軍升上德乙嘅布倫瑞克，一開閘就以2戰全勝排榜首，依家全隊信心爆棚。布倫瑞克教練拉巴歷治今晚38歲生日，假如擊敗拜仁，肯定係最佳生日禮物，不過呢位前德甲球星坦承呢個係「不可能任務」，畢竟拜仁係德國盃史上捧盃最多球隊，而且講明強陣，朱楓覺得布倫瑞克今場破到蛋已經有交代啦！