洪禮賢講馬：續領風騷光榮100分

猪拉多纳

　　人比人，比死人；馬比馬，又會唔會比死馬？但攞得嚟比較，冇理由嘥時間及心機，去秤兩匹低班馬邊隻有前途。喺得五班嘅，有「幾何」會一季之內殺得上頂班，多年前蔡廐招牌馬「獅子花」，一季之內6W，由贏五班田草1400米開始殺上去，簡直係奇觀，以及百年難得一遇！

　　咁攞咩馬去比較會合符效益？最正路係秤啲後生仔，譬如3歲嗰堆，睇吓有冇啲馬潛質未「揚」晒出嚟，可能大1歲，喺新一季發光發熱，變成閣下嘅長捧對象。

　　搵隻「續領風騷」嚟秤，仲係3歲，經過上季1W後，已被評100分，係咪到咗樽頸，真係唔多覺，只因咁後生已經喺百分關口，係一份光榮，如果今季唔能夠喺級際賽也文也武，應該好多人會跌眼鏡。

　　點解會話「續領風騷」評100分係光榮，其實亦稱得上被肯定！事關前季仲係3歲嘅「天久」， 當時季末被評103分，結果上季多擸3冠，G1香港經典一哩賽都畀佢攞走埋。以此推論，前駒今季或會係4歲系列賽嘅台柱！