德甲今晚開咧！多蒙特開胃嚼漢堡

猪拉多纳

05/08/2011


德甲今晚開咧，衞冕冠軍多蒙特主場撼漢堡！「蜜蜂兵」上季奪標，唔少人話佢哋「符碌」，今夏仲要走埋紐尼沙軒，人人等住睇佢哋死。不過力奇就信得過佢哋主帥高普，加上「極品壽司」香川真司回歸，要嚼呢個發霉漢堡有幾難？捧2.2倍「讓球主勝」！（有線61及201周六凌晨2:30直播）




多蒙特上季以7分優勢過終點，正當所有人都認定佢哋會喺暑假被豪門「肢解」，點知直到依家，真正放走咗嘅重心就只得過檔皇馬嘅紐尼沙軒。係，紐尼沙軒對「蜜蜂兵團」係好重要，但高普咁醒，放得沙軒走肯定計過晒數，咪忘記抖咗半年嘅香川真司今仗正式復出，中場創造力一定激增！


根度簡有力頂替沙軒


同時，多蒙特季前喺紐倫堡買入有土耳其血統嘅德國小國腳根度簡，之前呢位新星喺德國盃已交出一個靚助攻，新左閘基斯路維上仗表現都相當出色，今季實力話唔定不跌反升架，就算佢哋今仗有包括前鋒巴里奧斯、中場奧禾莫耶拉、巴格羅斯同守將舒姆沙缺陣，都一樣冇有怕。


漢堡熱身賽表現唔掂


老牌勁旅漢堡上季喺德甲只得第8，表現一般，佢哋今夏最大變動係買入車仔二打六中堅文切尼，頂替經驗老到嘅馬菲臣，係咪真係幫到手？力奇好懷疑囉。事實上，漢堡季前賽表現真係唔掂，上仗對華倫主場都輸1:2，踢季前盃仔時又吞過「蜜蜂兵團」兩蛋，今仗睇落都幾牙煙！