精英隊飛燕諾攜手做細界

猪拉多纳

05/08/2011
文： 亨格比利

新一季荷甲今晚開咧，揭幕戰由精英隊同飛燕諾合演「鹿特丹打吡」。今季聯賽有半數隊伍換咗教頭，精英隊同飛燕諾亦唔例外，兩位新帥林馬斯同朗奴高文都想攞頭威，但考慮到雙方鋒線疲弱，揀2.25倍細最明智。（開賽時間：周六凌晨2:00）


雙方鋒線齊死火


褪色班霸飛燕諾上季以第10名衝線，會方季前搵咗名帥朗奴高文執教鞭，期望佢老人家幫隊波重振雄風，但據荷蘭傳媒公布嘅網上投票，足足有48.2%球迷睇死朗奴高文幫唔到飛燕諾。畢竟湯馬臣退役加上迪卡恩同巴希亞兩件後防支柱離隊，搞到隊波缺乏老波骨壓場，更濕滯係去季首席射手卡斯泰亞奴斯轉會國米，就連攻擊中場利萊費亞都喺周三操練整傷左腳足踝，攻守兩瓣都有隱憂。




上季靠附加賽先有得留級嘅精英隊亦唔好得幾多，佢哋向來鋒力薄弱，限於財政問題，季前想簽個効力比利時乙組隆美聯嘅前鋒奧斯治都話唔夠錢，開鑼戰即使有地利睇怕都唔慌踢得進取，既然兩邊鋒力都冇乜說服力，入球細絕對抵玩！