法甲開鑼撐聖日耳門

猪拉多纳

06/08/2011
文： 牛奶仔

今晚法甲開鑼，最矚目嘅當然係「暴發戶」巴黎聖日耳門，佢哋今晚主場出擊迎戰實力一般嘅羅連安特，倒戈嘅加美路勢必大開殺戒，帶領聖日耳門打響頭炮，2.2倍「讓球主勝」抵到爛！（開賽時間：周日凌晨3:00）


加美路倒戈開殺戒


聖日耳門今夏被卡塔爾財團收購後，化身「法甲曼城」瘋狂掃貨，四圍羅致具質素球員，今場對手羅連安特亦係其中一名「受害者」。雖然阿根廷中場柏斯托尼今場應該未能趕及登場，不過倒戈嘅加美路，以及施素高、文尼斯及馬度迪等皆可上陣，呢班新兵經過多場熱身賽嘅磨合後漸見默契，相信今場面對實力一般嘅羅連安特可大勝一場！




中游分子羅連安特上季喺聯賽入咗46球，當中接近一半係由聯賽次席射手加美路貢獻，今夏佢哋將呢位孭飛射手賣咗畀聖日耳門，但又冇補充番前線兵源，實力大打折扣。同時，羅連安特一向不善作客，上季19場作客失咗35球，僅次於包艇嘅阿勒斯，今次作客首都豪門睇怕都難逃厄運。