周中國際賽未必搏德國或「副選」鬥巴西

猪拉多纳

07/08/2011
文： 力奇

德甲啱啱開咧，下周末就輪到英超，夾喺中間嘅周中國際賽，大家真係要小心中伏！《一周之計》今日首次同大家見面，就係要及早幫大家做定功課，慎防踩到地雷！




嚟緊周中國際賽都算惡戰連場，德國對巴西係其中一個焦點，德國領隊勒夫點兵，宣布放棄徵召啱啱隨同皇馬訪華嘅基迪拉同奧斯爾，實力唔多唔少受影響。仲有樣嘢要小心，就係德國大軍今次名單有8件拜仁兵，德甲開咧冇耐，班球員有乜冬瓜豆腐，勒夫實畀拜仁詐型，到時會唔會就住用班人真係難講。




日本仔喺札幌鬥南韓場波，主帥沙哲朗尼嘅23人大軍足足有14個外流球員，當中傷愈獲重召嘅香川真司，佢効力嘅多蒙特教練高普已經向沙帥施壓表達不滿，話唔定今次只係遊次飛機河踢十幾分鐘。