德國巴西大哂冷

猪拉多纳

10/08/2011


地球好危險，全球股市暴瀉，倫敦爆發大規模動亂，恍如世界末日！喺呢個亂世想忘記煩惱，約埋三五知己一齊睇波分甘同味，不失為減壓良方。今晚免費電視台有場重量級熱身賽直播，德國主場對巴西，兩國共奪八屆世界盃冠軍，心口加埋有八粒星，加上雙方同屬主攻型球隊，相信不乏入波鏡頭，畀大家盡情歡呼大嗌，不妨買埋大盤，有錢收就更高興。




（無綫翡翠台周四凌晨2時45分直播）




依家真係世界變，被稱為超級強國嘅美國都失去三條Ａ主權評級，歐洲唔少國家深受債務危機打擊。德國仍然屹立不倒，歸根究柢同民族性有關。德國人重視紀律，理財量入為出，自然富強。德國足球亦具有相同理念，德甲球會唔會亂使錢買球星，而係注重青訓，令近年大量新星湧現，不斷為國家隊注入力量。


巴西勢踢爭氣波


多蒙特上季憑青春班奪得聯賽冠軍就係成功例子，佢哋今次為德國隊貢獻四位球員，包括馬里奧葛斯、施雲賓達、根度簡及曉姆斯，馬里奧葛斯喺德甲揭曉戰即取得入球，狀態弗到漏，更被「凱撒大帝」碧根鮑華喻為勁過美斯。呢班生牯仔勝在年輕，可謂nothing to lose，如果有表現，博到領隊勒夫歡心，將來或可穩佔國家位置，所以有機會上陣一定搏命。至於「拜仁幫」湯馬士梅拿、馬里奧高美斯及舒韋恩史迪加為保位置，亦唔會放鬆，球隊有良性競爭，充滿活力，配合主攻戰術，係德國近年成為「進攻王」主因。




至於巴西喺美洲國家盃慘淡出局，領隊文奴文尼斯聞到魷魚香，球隊未來一段時間嘅表現，好大程度上決定佢仲有冇得留低。因此文帥今次不敢怠慢，徵召強陣出擊，羅賓奴、柏圖及尼馬都有入選，大有不勝無歸之感。基於巴西喺美洲盃期間進攻表現未如理想，相信文奴文尼斯會針對呢個問題落藥，趁熱身賽重點演練進攻，希望重拾森巴足球火力，考慮到德國攻強於守，巴西應可取得入球。




Mic少

德巴近20年對賽成績

年份 賽事 戰果（半場）

05 洲國盃 巴勝3:2（2:2）

04 熱身賽 德和1:1（1:1）

02 世界盃 巴勝2:0（0:0）#

99 洲國盃 巴勝4:0（0:0）#

98 熱身賽 巴勝2:1（1:0）

93 熱身賽 德勝2:1（2:1）

93 熱身賽 巴和3:3（3:0）#

92 熱身賽 巴勝3:1（2:0）

註：前者主場　#為中立場