英格蘭強細抗綠鷹

猪拉多纳

10/08/2011
文： 麥馬拿仁

在哥倫比亞舉行的世青盃，明早續演十六強四場賽事，「細王」英格蘭U20出戰尼日利亞U20，必再追細。「小三獅」與大國腳、U21國家隊倒模一樣，冇入波板斧但勝在後防穩陣，三場分組賽全開0:0，去到淘汰賽必更加謹慎，「小綠鷹」尼日利亞未必咬得入佢哋！（周四早上6時開賽）




數英格蘭近年足球天才，來來去去都係講加斯居尼同荷杜，就知「三獅兵團」人才有幾凋零。英格蘭球員特點係速度快、身位夠，着重整體合作，但講到做波組織就曳到極。之前U21歐洲國家盃，英軍中前場毫無呼應，係得後防踢得穩陣，依家呢隊U20亦有同一問題。




英格蘭分組賽三戰對阿根廷、墨西哥同北韓，全部踢成0:0，反映球隊根本冇入波把握，今戰本屆攻力最強嘅尼日利亞，領隊伊斯迪唔死守先奇。「小鷹」於分組賽三戰全勝攻入十二球，但對手實力唔強，今戰就算擊敗英軍，預計都只能小勝，吼細穩陣。


狂牛撲擊太極虎


另外一場西班牙U20鬥南韓U20，「鬥牛國」近年號令天下，大國腳同U21國家隊都勢不可當，球隊分組賽三戰都唔只贏一粒，今場對「太極幼虎」，捧西班牙「讓球主勝」。