德國蜜蜂仔拮爆巴西！

猪拉多纳

10/08/2011
文： 安高

超重量級嘅熱身賽，由3屆世界盃冠軍德國喺史特加迎戰5屆盟主巴西。「日耳曼兵團」今場除咗有地利外，最緊要係佢哋近年新人輩出，進攻踢法有姿勢有實際；反觀「森巴兵團」啱啱喺美洲盃8強出局，球隊陷入青黃不接局面，領隊文奴文尼斯今次召入6名新人，擺明試陣居多，德國讓平半，安高今場捧1.94倍上盤！（無綫翡翠台周四凌晨2:45直播）


多蒙特新星爭上位


2010年世盃季軍德國近年新星不絕，一眾主力如普多斯基、湯馬士梅拿同拿姆等都仲喺當打之年，眨吓眼又冒起另一班新人，諸如卻奧斯、馬里奧葛斯同舒賀爾尼等，就連今次領隊勒夫點兵，都可以大膽到話畀中場主力奧斯爾同基迪拉抖抖，改而徵召2名首次入選新兵多蒙特中場根度簡同馬高列奧斯等。


德國多人材奧斯爾抖抖


當中最值得寄予厚望係4隻「蜜蜂仔」，曉姆斯喺後防愈見大將風範，中場施雲賓達、馬里奧葛斯同根度簡都係可以獨當一面之輩，要知道畀碧根鮑華讚譽為「德國美斯」嘅哥斯基奧斯，今次仲要係冇份入選，咁大批後浪湧上嚟，試問一眾國腳有邊個夠膽揸流攤？


巴西徵召6新仔試陣


巴西方面，之前喺美洲盃都係8強出局，整體表現真係麻麻哋。佢哋今次點兵，都係繼續由羅賓奴、尼馬同柏圖擔大旗。唔係話安高睇小佢哋，但呢班波缺少咗朗拿甸奴同卡卡等經驗戰將，打大賽真係唔多信得過。文奴文尼斯搵嚟6名新兵，話想睇吓邊個信得過做未來棟樑，以呢批人腳水平，巴西真係前程似「咁」囉！