西班牙當銳反轉意乙兵

猪拉多纳

10/08/2011
文： 朱楓

4屆世盃冠軍意大利，會喺巴里主場硬撼「雙冠王」西班牙。「鬥牛兵」近年踢到出神入化，今場更有超新星堤亞高艾簡達拿初試啼聲，相反意大利近年青黃不接，今次仲衰到要選意乙兵先湊夠腳，唔到朱楓唔捧西班牙上盤！（廣東體育周四凌晨2:45直播）




西班牙近年威盡球壇，先後贏得歐國盃同世界盃，除上年11月作客葡萄牙意外大敗0:4外都贏到開巷，暫時喺歐國盃外圍賽I組更5戰全勝排榜首，出線決賽周只係時間問題。


艾簡達拿首度入選


雖然西班牙今次有中場沙維、法比加斯、後防沙治奧拉莫斯同佩奧爾缺陣，要補選馬拉加左閘蒙利爾，但仍有前鋒韋拿、中場恩尼斯達同門將卡斯拿斯孭飛，不過西班牙一向踢整體戰，影響根本唔大。值得一提，西班牙今次成功搶贏巴西，首次徵召有森巴血統嘅堤亞高艾簡達拿入伍，呢位巴塞新星近期弗到爆，早前踢拜仁四角賽奧迪盃光芒四射，朱楓相信呢位喺巴里出世嘅新星，今晚重返出生地比賽，必定會施展渾身解數。




反觀意大利就一代不如一代，早排喺熱身賽更以0:2不敵歐洲二線嘅愛爾蘭。今次硬撼西班牙，領隊柏蘭迪尼竟棄用前鋒基拿甸奴、馬特尼同波里路，重召羅馬中場迪羅斯，仲搵埋森多利亞中場柏林保同拖連奴後防奧邦拿兩位意乙兵，再加上前線有卡斯辛奴同巴洛迪利兩大麻煩友，中場繼續靠派路發辦，你唔係對意大利仲有期望呀？