洪禮賢講馬：兩賽日值得緬懷

猪拉多纳

　　做人老公老婆、男女朋友，或者其他單對單嘅關係，總可能有一堆日子要記住。以拖友為例， 甚麼相識100日、首次拖手、第1次接吻、初次嘈交、拍拖一周年等等，一路唔去記猶自可，一旦有做開慶祝活動，但忽然喺某個紀念日冇咗件事，輕則耳仔受「噪音」蹂躪，重則隨時招致高踭鞋來襲。

　　所以話，任何紀念日子，享受過當天過程一點一滴便足夠，不要太過緬懷，活在當下嘛，勿太重視某年某日（洪某冇本事，因已婚），倒不如向前望，譬如諗吓嚟緊聖誕去邊好過﹗

　　如果講到上季賽事，有邊日會令我特別記得，可能值得紀錄，腦海中至少有兩個沙田賽日，但唔係因為輸得甘或中得冧！而係當日啲大熱門好似如有神助，成績好到唔信。第1日係2月5日，兔年賀歲賽日，11場賽事裏，大熱門獲5冠2亞2季，得兩駒冇P咋。

　　另1日係4月25日，當日大熱門仲犀利，由頭場「熊英雄」，殺到落第十一場「續領風騷」，居然冇1匹唔喺三甲佔一席位，埋單計數，交出6冠3亞2季，當日大熱門入Q率高逾8成，真係邊場飛親大熱，幾乎等同冇錢收咁滯。而呢啲日子雖然唔會經常出現，久唔久有1日，應該係馬迷樂見嘅賽果。

洪禮賢