利物浦做東迎新特蘭

猪拉多纳

13/08/2011
文： 樂比堅尼

萬眾期待嘅英超今日開鑼，重頭戲之一係利物浦主場對新特蘭。「紅軍」係樂比仔今季極為睇好球隊，除因為精神領袖杜格利殊領軍後，令利物浦回復昔日朝氣，又唔使兼顧歐洲賽，亦係「紅軍」今季極大優勢，首戰對甩皮甩骨嘅「黑貓」新特蘭，相信可順利打響頭炮，捧「讓球主勝」！（有線200及300台周六晚10時直播）


紅軍大翻新啱風格


利物浦上季季中由杜格利殊接掌後，逐漸淡化賓尼迪斯時代嘅西班牙色彩，先後引入安祖卡路爾、查理阿當、佐敦軒達臣及達寧等英倫球員，此舉符合杜老嘅戰術理念同作戰風格，可以話行啱咗路。畢竟論財力、人腳，利物浦根本難以與曼聯、車路士正面對撼，唯獨以最擅長嘅傳統英式風格，打甩門牙帶血吞嘅作戰態度，話唔定可殺出一條血路，而新王牌蘇亞雷斯可任後備，爭勝本錢更足。




新特蘭近幾季不斷燒錢之下，成功保住中游位置，但樂比仔對領隊布魯士嘅買人策略卻不敢苟同，今季羅致布朗、奧沙兩名曼聯棄將後，加埋費沙甘保、巴士利及基蘭李察臣，令前曼聯球員人數多達五人，難怪被英傳媒嘲為曼聯二隊。


黑貓執曼聯口水尾


雖然新特蘭今季喺轉會市場上，表面上交投非常活躍，但買番嚟嘅二線球員較多，合作性令人存疑，兩名核心球員戴倫賓特及佐敦軒達臣先後離開，影響之深遠亦比想像中嚴重，淨係睇下戴倫賓特上季季中離隊後，「黑貓」陷入一和八負嘅低潮，樂比仔認為季初未係捧「黑貓」最佳時機。