紐卡素主場爆破兵工廠

猪拉多纳

13/08/2011
文： 山度士

新一季英超今晚正式開鑼，度士好開心今季可以繼續喺《東方波經》同讀者傾波經。阿仙奴近期受兩大主力法比加斯及拿斯尼轉會消息影響，隊波仲未Ready，紐卡素上季主、客兩循環都冇輸過畀兵工廠，今場隨時再有神來之筆，相信主隊起碼可以坐和望贏。（有線200及300台周日凌晨零時30分直播）




如果要數上季英超最精彩賽事，紐卡素主場4比4打和阿仙奴一役肯定係其中之一，雖然相比當年有真路拿、舒利亞等球星壓陣嘅時代，依家紐卡素星味係弱啲，不過度士最欣賞佢哋嗰種「打甩門牙帶血吞」嘅拚搏精神，阿仙奴最怕硬淨型球隊，上季兩鬥紐卡素一和一負就係最佳證明。


阿仙奴軍心不穩


直至截稿前一刻，法比加斯離隊差不多已成事實，只欠阿仙奴或巴塞隆拿正式公布相關消息，呢點對阿仙奴軍心同備戰都有一定影響，而且呢場係球季第一場賽事，兵工廠未必咁快上力，紐卡素首戰有主場之利當然唔想衰，所以阿仙奴作客失分一啲都唔奇。