李斯特城氣勢勁圍攻雷丁

猪拉多纳

13/08/2011
文： 洪心Dee

李斯特城上季初改由艾歷臣執教後大躍進，最後喺英冠以第10名衝線，算有交代。今季李城繼續獲班主開水喉，艾帥即刻引入10多位名氣實力兼備嘅球員，令「狐狸」成為今季英冠奪標大熱，今晚佢哋回師主場鬥雷丁，根本冇理由失威，捧1.72倍主勝！（開賽時間：周六晚10:00）


英超班底新季2連勝


睇番李斯特城季前熱身賽，表現確係相當出色，對手強如皇馬同華倫都只係僅輸1球，開咧兩仗更順利贏波，有料到架！事實上，李城今仗雖有前鋒華素爾停賽，但佢哋今夏先後喺曼城借入中場米高莊遜，又喺紅軍引入後衞保羅干卓斯基，加埋原有「英超腳」安迪京治及18歲德國新星、上仗入3粒嘅舒洛比等，呢班波嘅實力踢英冠，仲唔超晒班咩！




相反，對家雷丁就慘咯，喺上季入咗23球嘅愛爾蘭射手沙恩朗轉投西布朗，又冇引入具級數嘅鋒將補充實力，鋒力大幅削弱，冇咗佢仲靠邊個食胡先？今鋪面對強勢嘅李斯特城，想輸少粒都唔係咁易！