皇馬復仇有heart搶頭胡

猪拉多纳

14/08/2011
文： 法比加輝

波樂園今日隆重開幕，首個重頭節目，係周一凌晨開打嘅西班牙超級盃首回合，皇家馬德里主場迎戰巴塞隆拿。兩軍備戰態度大不同，皇馬熱身賽場場「打真軍」，但巴塞就一個Hea字形容晒，加上佢哋班南美兵又掛住放假遲遲未歸隊，美斯更連一場熱身賽都未踢過，態度如此散漫又點能踢出應有水準？今場撐「艦隊」。（now 632周一凌晨4時直播）


艦隊七場熱身賽贏晒


失敗往往係令人發憤嘅源頭，「天生勝利者」莫連奴上季「掌艦」後嘗盡挫折，聯賽同歐聯兩大賽事都輸畀死敵巴塞，最羞辱係皇馬喺多場對賽明顯唔夠踢，包括上季首循環聯賽就災難性淨吞五蛋，令「寸王」輸到唔識寸。但正因為受盡屈辱，唔服輸嘅莫連奴季前積極備戰，熱身賽唔理對手強弱，一樣照「打真軍」，結果七場熱身賽全部贏晒，喪入廿七球，多名主將C朗、賓施馬及奧斯爾均顯示出強勁狀態，就連卡卡亦有復甦迹象。




反觀巴塞態度完全相反，教練哥迪奧拿似乎完全唔在乎熱身賽嘅成績，多場賽事都冇精銳盡出，就如早前嘅奧迪盃及美國之行，都派大批後生仔上陣，令主力球員備戰機會不多。但最令加輝摸不着頭腦係巴塞竟讓一眾南美球員放長假，好似美斯、丹尼爾及馬斯真蘭奴等既冇去德國踢奧迪盃，又冇參與美國之行，狀態的確令人擔心。


美斯度假煲煙唔使預


其中美斯仔喺美洲國家盃已經唔弗，度假時又畀「狗仔隊」影到煲煙，如今連一場熱身賽都未踢過，想見到佢「一扭十」，睇怕仲要等多一排。再者中場大腦沙維因傷缺陣，碧基、布斯基斯就有微傷在身上陣成疑，加上又要作客，加輝今場當然睇好「艦隊」。