FSV作客搶特

猪拉多纳

14/08/2011
文： Mic少

德國已成中日韓球員樂土，香川真司、孫弘民及內田篤人喺德甲已成為星級戰將，德乙鄭大世及邵佳一，大家亦耳熟能詳。波琴日前簽下日本中場乾貴士，連弱隊FSV法蘭克福亦加入呢股亞洲熱，羅致咗南韓中場周泰雲。


周泰雲「二打六」都掂


現年廿一歲嘅周泰雲之前只係踢南韓大學聯賽，老實講佢份「履歷表」真係唔夠分量，但都可以攞到一份兩年合約，睇嚟德乙入門門檻都幾低，如果本港球員去拍門，隨時都可以留低。




周泰雲喺FSV法蘭克福首兩場聯賽只係後備，但上仗正選上陣，似乎已站穩陣腳，預料佢今晚會再次擔任正選，作客對恩高斯達特。兩隊今季同樣未開齋，但相比下FSV防守較好，相信恩軍咬唔入佢哋，可捧FSV法蘭克福「讓球客勝」。（周日晚7時30分開賽）




講到亞洲球員，當然要提有邵佳一助陣嘅杜伊斯堡，邵佳一早前已經有波入，但其他隊友唔生性，搞到聯賽仲未贏波，畢竟足球係群體運動，單靠個人力量並唔夠，杜伊斯堡今晚主場讓唔起羅斯托克，捧「讓球客勝」。另外，1860慕尼黑主場對奧厄，1860今季踢法好有娛樂性，場場同對手大比數交易，球迷睇得開心，亦可放心捧入球大。