福岡黃蜂針唔到前鋒

猪拉多纳

14/08/2011
文： 蘇豪

法比加斯同阿仙奴不和平分手，身邊不少「兵工廠」人發功，有人祝法比仔喺巴塞隆拿長居後備，亦有惡毒「巴打」祈求前隊長早日斷腳收山。




愛侶會走，球員亦會走，因愛成恨，例子不勝枚舉，猶記當日泰維斯棄「魔」投「城」亦被小弟插到體無完膚，不過，一夜夫妻百夜恩，好來也好去，推介加輝飲歌《Don't look back in anger》，別記恨，向前看。


新帥淺野係「小學雞」


篠田善之一手帶領福岡黃蜂由日乙殺上日職，曾經歡快一時，短暫蜜月期過去，球隊戰績插水長期沉淪谷底垂危等降班，會方毫不念舊請篠田食無情雞。新帥淺野哲也領軍經驗唔多，喺當地球壇只屬「小學雞」，冇頭冇面冇料冇兵，想帶領黃蜂創造奇迹絕地反擊護級成功，機會不大於利物浦再次打入歐聯決賽落後三球追番三球最後射贏十二碼捧盃。




現實容不下狂想，福岡黃蜂換帥首戰對大阪飛腳又輸，四連敗失十球兼交白卷，唔識攻唔識守，如何創造奇迹？本周淺野哲也首度喺主場領軍福岡黃蜂決戰川崎前鋒，唔怕黃蜂尾後針，要前鋒！（周日晚6時開賽）