世青盃夢幻戰 西班牙旺過巴西

猪拉多纳

14/08/2011


世青盃聽朝上演夢幻八強，巴西U20對西班牙U20，呢兩個足球王國無論喺任何年齡級別賽事，都獨當一面，今場無疑係決賽戲碼，當中含意已超越獎盃之爭，更關乎球壇一哥榮譽誰屬。西班牙「足球國運」當旺，可秤高少少，呢場巔峰對決理應開平手盤，但偏偏唔開，建議揀「晉級球隊」1.82倍西班牙晉級。（周一早上7時開賽）




巴西四次奪世青盃冠軍，而西班牙只係九九年攞過一次，不過時移世易，西班牙目前喺球壇氣勢蓋過巴西，大國腳上年捧世界盃，今年六月舉行嘅U21歐國盃亦落入佢哋手，名副其實大小通殺。反而巴西近年冇乜建樹，「足球國運」轉差，睇下佢哋班大國腳喺美洲盃八強互射十二碼全炒，就知幾黑仔，如果今場要用互射十二碼分勝負，西班牙信心上贏晒，所以相信踢到最後，晉級一方都係西班牙。




另外，讓球主客和，由初盤西班牙讓波，依家變成受讓，可考慮捧西班牙讓球勝。


尼日利亞U20唔赦法國


另一場八強法國U20對尼日利亞U20，非洲球員比較早熟，所以喺青年級別賽事表現，比傳統足球強國有過之而無不及，而且加納上屆捧走世青盃，打破歐美壟斷局面，證明非洲兵團已具爭標實力，呢場波又係冇開平手盤，同樣要「晉級球隊」尼日利亞U20晉級。