C朗挑戰百球on Fire

猪拉多纳

14/08/2011


皇馬Vs巴塞就等於C朗Vs美斯？錯喇！今晚西超盃焦點係「C朗打吡戰」！「智利C朗」阿歷斯山齊士（A山），今仗會首披巴塞戰衣挑戰皇馬正牌C朗，賽前有傳媒為佢兩個做全面分析，100分滿分A山只以82:86落後4分。力爭巴塞處子入球嘅A山固然想「一球成名」，至於力爭喺皇馬第100球嘅C朗，亦要為呢場「招牌保衞戰」使出真功夫！




上季喺意甲烏甸尼斯踢到曉飛嘅A山，加盟巴塞之後曾經話：「我唔想做巴塞C朗，我要打響自己名堂。」以為佢好寸咩？但佢又好乖咁話：「我知道美斯係巴塞嘅主人，我希望可以跟佢、沙維同恩尼斯達等巨星學習。」勁識賣口乖。




能力評分C朗險勝86:82




網站Goal.com早前搵嚟意、西兩地資深編輯為真假C朗做咗次全面比較，以20項能力比併，每項最多為5分，計算二人真正戰鬥力。結果佢哋喺衝刺力、大賽表現、決策、領導、效率、突破、傳球、腳法、體質、速度、耐力同力量等12項打成平手，C朗喺遠射、罰球、12碼、左右腳均衡同頭槌5項佔先，但A山嘅團體性、創造力同盤球較優勝，總分係C朗小勝86:82。




總括嚟講，C朗嘅能力暫時仲有些微優勢，但喺大賽就始終經常失準，假以時日A山話唔定有力超越佢。事實上，C朗過往7次踢西班牙國家打吡只入得2球，對於要保住招牌，已經為皇馬入咗99球嘅佢，當然想今晚「一球正名」！


賽制


採主客兩回合，今輪為首回合，若兩回合總比數賽和，以作客入球較多一方為勝，若作客入球數字相同，則在次回合後加時30分鐘，再和則互射12碼分勝負。