杜伊斯堡係時候開齋

猪拉多纳

14/08/2011
文： BlackJack

上個禮拜Black Jack好好彩中咗條4.88倍嘅三串一，雖然唔係好分，不過總算開到齋，呢個星期希望再接再厲，攞杜伊斯堡、哥列迪巴同甘美奧3個主W過關，係就係熱到得4.62倍，但係師傅教落主隊幾時都穩陣過作客嘅。




杜伊斯堡同羅斯托克都係目前德乙未開胡嘅球隊，其中杜伊斯堡使咗唔少錢擴軍，自然令人好失望，德國傳媒《萊茵郵報》、《西部報》都話「斑馬」主要問題係新兵多，連教練薩基奇都有啲進退失據，頭兩場聯賽失咗5球就加強中場，改踢單箭頭，點知又唔用邵佳一呢類創造性進攻中場做正選，結果上場波連FSV法蘭克福都贏唔到。


巴甲主勝率接近5成


查實杜伊斯堡3場波贏唔到未必係壞事，起碼依家成隊波知道問題响邊度，今晚主場對住同樣3戰不勝嘅羅斯托克，佢哋贏面始終秤先啲，尤其今場波係由嚟自漢堡嘅阿連拿執法，呢個現職警員吹得比較嚴，客軍羅斯托克攻擊力麻麻，想用硬朗打法頂住杜伊斯堡，隨時會畀球證罰餐懵。




巴甲嗰兩場都係博主隊，原因係呢個聯賽主勝率維持响接近5成，主隊入球率有成1.55球，明顯大多數球隊係靠地頭搵食，其中哥列迪巴唔只主場勝率達5成，仲係至叻响70分鐘至完場前發難嘅後勁分子，贏明尼路應該唔難。另一場揀甘美奧主要貪佢夠熱，往績亦比較對辦，富明尼斯係巴甲作客五弱之一，相信劫數難逃。